Talo Na Naman Ang Ginebra

Umpisa pa lang, ang kabog sa dibdib ko

Ay dinaig pa ang talbog ng bolang wari'y 

Magdudulot ng kumbulsyon

Umpisa pa lang, medyo ramdam ko na

Ang padehadong tagpo na lagi'y daloy 

Ng iyong laro sa liga.

Wala namang masama na sumandig na 

Lamang sa pananalig

Tiim-bagang napapapikit at ngiwi, 

Sa mga galawang hindi ka makapagtimpi

Sa mga nasayang na bola, buslong hindi man

Lang maging puntos

Gaya ng pag-ibig ko sa 'yo, ni ayaw umusad

Ni ayaw tumagos.

Nasayang nga ba ang panahon ko sa 'yo?

Ako nga ba'y kumuha ng batong ipupukpok 

sa ulo ko?

Ang ligalig at pighati sa tuwing mamasdan kang 

Unti-unting nilalampaso, tinatambakan

Hindi ba't sakit lamang sa puso ang

Puede nitong kahinatnan?

Kinse. Bente...minsan pa nga, trenta!

Tambak ka na nga sa puntos, tambak ka pa

Sa Alaska. 

Pero, tangina! Daig mo pa sadista!

Talagang tutok ka pa't kumukuyakoy pa!

Pero bakit laging ganoon? Andoon pa rin ako?

Kahit noong panahon ni Jawo hanggang ngayong era ni Caguioa.

Aasa sa himala, aasa sa panaka-nakang ragasa.

Ang makita kang pumalag at gapangin man lang

Ang di maubus-ubos na lamang.

Marahil gaya ng damdaming iginugupo ng 

Mga hinaing na kailanma'y di ka magiging akin

Magkakasya sa mumunting saya, 

Makukuntento sa panumandaling ligaya.

Hindi mo na iisiping sa huli'y muli'y mabibigo

Ang makita kang lumaba'y mistulang 

Pakunsuwelo de bobo.

O di kaya'y ito talaga ang tagpong 

Ipagpapatayan mo?

Na malanghap ang espiritu ng hindi pagbitaw,

Na danasin ang pagbulusok at pag-angat

Sa nagdedeliryong damdaming walang 

Gatol sa paghiyaw.

Ayan na nga, muli'y talo sa huli

Alumpihit kang tatayo sa upuang

Sumalo lahat ng nerbiyos mo't puwersa

Ang mala tsubibong saksi ng iyong

Lungkot st saya.

Tuwing talo ang Ginebra, ika'y naaalala

Dahil anumang pilit kong habulin ka,

Anumang pilit kong sumubsob at magkumahog

Habang animo'y abot-kamay na kita

Para kang siya, siya na pag nakamtan mo'y

Kampeonato ngang talaga

Ngunit gaya nga ng never-say-die ng Ginebra

Sa paghabol ay masaya, sa pag-asa'y matutulala

Ngunit gaya ng laging ending ng pagragasa

Sa huli'y susukuan ka rin, gaya ng ganap nating dalawa.